Perfil

O posto ten como obxecto dar soporte xurídico ao demostrador multisectorial DATAlife, sentando as bases para a definición do marco legal e de gobernanza e facilitando o cumprimento da normativa europea e estatal en materia de datos.

A persoa contratada axudará a establecer unhas bases sólidas que permitan a implantación correcta do proxecto e a súa continuidade no futuro.

Requisitos

• Titulación: Nivel 3 (Grao + Máster) segundo o Marco Español de Cualificacións para a Educación Superior recollido no Real decreto 1027/2011, do 15 de xullo, ou as súas equivalentes. O grao deberá pertencer aos seguintes ámbitos de coñecemento:
  • Dereito e especialidades xurídicas.
• Experiencia: Non se require.
• Outros: Non se require.

Duración do contrato e condicións laborais

• Desde a sinatura do contrato ata a finalización do proxecto Demostrador Multisectorial DATAlife  (prevista inicialmente para o 30/06/2026).
• Inicio previsto: decembro 2025.
• Xornada laboral completa de 39 h. en horario de inverno e 35 horas en horario de verán, con flexibilidade horaria e posibilidade de teletraballo.
• 22 días de vacacións e días de asuntos propios.

Salario

32.493,02 € brutos anuais en 14 pagas.

Ubicación

CESGA (Centro de Supercomputación de Galicia) - Fundación pública pioneira na computación de altas prestacións, situada no centro da cidade de Santiago de Compostela, no campus universitario, pulmón verde da cidade. 

Avenida de Vigo, s/n, 15705 - 42º52.539 N 8º33.196 W.

Funcións

As necesarias para apoiar o desenvolvemento axeitado do proxecto no seu ámbito xurídico. Para iso levará a cabo principalmente as seguintes tarefas:

• Colaborar co equipo do proxecto na definición inicial do marco de gobernanza do espazo de datos, propoñendo políticas, roles e procedementos de referencia.
• Revisar e sinalar implicacións normativas básicas en relación co RGPD, LOPDGDD, Data Governance Act, Data Act, AI Act e coa normativa sectorial máis relevante (saúde, agroalimentario, medioambiental).
• Elaborar borradores ou modelos tipo de acordos e contratos (accesos, uso e cesión de datos, acordos de tratamento), que poidan servir como base para o desenvolvemento posterior do proxecto.
• Facilitar a interlocución con provedores e expertos especializados externos, canalizando recomendacións técnicas e xurídicas para a súa integración no proxecto.
• Propoñer protocolos de seguridade xurídica e privacidade a nivel orientativo, incluíndo recomendacións sobre anonimización, trazabilidade e acceso controlado.
• Dar apoio xurídico puntual ao CESGA, DIH DATAlife e colaboradores externos en relación coas implicacións legais dos servizos experimentais que se ofrezan no marco do demostrador.
• Identificar riscos legais e elaborar recomendacións de medidas preventivas
• Outras tarefas de carácter xurídico que sexan necesarias para apoiar a execución do proxecto no período de duración do contrato.